Жанар Айжанова: «Келінімді қызымдай көремін дегенді ұнатпаймын»

"Келінімді қызымдай көремін" деген көлгірсуді жақсы көрмеймін. Келін ешқашан қызыңдай болмайды. Осылай айтқан соң, не енесі ененің рөлін атқара алмайды, не келіні өз міндетін түсінбейді. Ақыры шатасу басталады.

Қазақ радиосындағы "Біздің мейман" хабарына қонаққа келген әнші Жанар Айжанова осындай көзқарасымен бөліскен болатын.
"Бұрын қалай еді?! Өз үйімді айтар болсам, шешем 13 бала тапқан ана ғой. Кейде әкемізбен арада ыдыс-аяқ сылдырлап, кішкене дау туатын кездер де болады. Сондай кезде, пештің түбінде отырған шүйкедей ғана кемпір, яғни менің әжем: "Әй, қойыңдар, "Күдік иманды қашырады", аузыңа келгенді айта берме! Бар, кет, тамағыңды істе", - деп ұрысқан бойда,әке-шешем жым болады. Екеуінен қыңқ деген дыбыс шықпайды.
Былай қарасаң, екеуін де ұрып тәрбиелемеді. Енеге деген сыйластық қой. Әйтпесе, шүйкедей кемпір не істей алады дейсің?! Бірақ енелік мысы басқаны шындық.
Біз осыны жоғалтып алған секілдіміз" - дейді әнші.