Сахнадағы қарсыласы Бекарыс болмаса екен деп тілейтін айтыскерлер көп. Бұл туралы айтыскер Рүстем Қайыртай Қазақ радиосының «Біздің мейман» бағдарламасында айтып берді.
Рүстем Қайыртай өткен жылы ұлттық өнерді ұлықтаған 16 жобаға қатысты. Қоржынын жүлдемен толтырған ол 16 айтыстың тең жартысында жеңімпаз атанды. Бас жүлдеден бастап, бірінші, екінші орындарды жеңіп алған ақын Қызылордада өткен айтысты ерекше өткендігін атап өтті.
«Соңғы үш айтыс сахнадан жеребе бойынша жұптау өтті. Алматыға айтысқа ақындарды бір күн бұрын жұптады. Кішкене салиқалы және салмақтырақ шықсын деген ниетпен. Негізі айтыс оң жақтан бір көрермен, сол жақтан бір көрермен жеребемен шығып, ақындарды жұптайды. Алдағы уақытта да осы бағытта ұйымдастырылады деген ойдамын. Қызылордада Текей батырдың 350 жылдығына орай ұйымдастырылған айтыста бір кісі Мұхтар Ниязовты, тағы бір кісі менің аты-жөнімді атады. Кіммен айтысатынымызды білмейміз. Бәріміз анталап тұрмыз. Алдын – ала жұптап қойса, қарсыласың туралы ақпарат жинайсың. Бірақ, арнайы бір ай дайындалсаң да, сондай айтыс шыға қоймайтын айтыс болды. Биыл осы айтыс өзімді дәлелдей алдым. Сахнада Мұхтар Ниязовпен 40 минут айтысқаным көпшіліктің де көңілінен шықты» - дейді айтыскер, ақын Рүстем Қайыртай.