«Баспана» ипотекалық ұйымы баспасөз қызметінің хабарлауынша, «7-20-25» бағдарламасы бойынша берілетін баспананың орташа ауданы 62 шаршы метрді құрайды. Нарық көрсеткіштеріне сәйкес, мұндай аумаққа 2 бөлмелі пәтердің сәйкес келетіні анықталды.
Отбасының айлық табыс көлемі 200 мың теңгені құрайтын, 24-40 жас аралығындағы Қазақстан Республикасы азаматының аталған бағдарлама бойынша қарыз алуға мүмкіндігі бар. Берілетін баспананың орташа бағасы 14,6 млн теңгені құрайды.
«Бағдарламаға қатысқан көптеген азаматтардың өтініштері мақұлданғанын байқап отырмыз. Бұл «7-20-25» бағдарламасының әлеуметтік маңыздылығын әрі дер кезінде қолға алынғандығын айқындайды»,-дейді «Баспана» ипотекалық ұйымының Басқарма төрағасы Қайрат Алтынбеков.
Осы күнге дейін келіп түскен 1323 өтініштің 843-і банктер тарапынан мақұлданды. Оның құны 9,7 млрд теңгені құрайды.
Қазақстандықтар ЦеснаБанк, АТФБанк, ЦентрКредит және Bank RBK банктері арқылы несие ала алады.