Қазақ радиосының «Жадымда қалған сол әуен» хабарында ҚР Еңбек сіңірген мәдениет қызметкері, ҚР Композиторлар одағының мүшесі, сазгер Қалибек Деріпсалдин қонақта болды.
Сырлы да сазды әндерімен тыңдаушысының жүрегінен орын алған сазгер сәуір айының 25-і күні «Астана» концерт залында шығармашылық кешін өткізеді. Сазгердің бүгінде 100-ге жуық әні, 50-ге жуық күйі бар. Әндерін есімі елге танымал – Нұрғали Нүсіпжанов, Ғазиза Жұмекенова, Сүлеймен Ибрагимов, Мейрамбек Беспаев, Сәкен Майғазиев, Досымжан Таңатаров, Есет Сәдуақасов сынды әншілер орындайды.
Хабар барысында сазгердің өмір өнегесі, шығармашылығы әңгімеге арқау болды. «Шығармашылығымның шарықтап, шынайы әндерімнің келуі туған жерімнің топырағының әсерінен»,-деді Қалибек Деріпсалдин өз сұхбатында.
Хабардың авторы әрі жүргізушісі- Ғалия Есқұлова.