Үкімет Мемлекет басшысы Қасым-Жомарт Тоқаевтың тапсырмасымен биылғы көктемде су тасқынынан зардап шеккен азаматтарды қолдау жұмыстарын жалғастырып жатыр.
Залалды өтеу жұмыстары жалғасуда және Үкіметтің қатаң бақылауына алынған. Қазақстан Президентінің тапсырмасымен барлық зардап шеккен азаматқа жан-жақты көмек пен қолдау көрсетіледі.
11 мамырдағы жағдай бойынша 130 отбасы ескі тұрғын үйлерінің орнына жаңа баспанаға ие болды. Бұл ретте Ақтөбе, Қостанай, Солтүстік Қазақстан, Павлодар облыстарында зардап шеккен азаматтарға берілетін 239 жаңа үй салынып жатыр. Сонымен қатар 568 отбасы 710 млн теңгеден астам сомаға тұрғын үйді жөндеуге және қалпына келтіруге өтемақы алды. Жалпы алғанда, зардап шеккен өңірлерде 9995 тұрғын үй тексеріліп, 7522 нысанда бағалау жұмыстары жүргізілді.
Бүгінде 20 601 отбасы 7,4 млрд теңгеден астам сомаға 100 АЕК мөлшерінде біржолғы төлем алды. Мал шығыны үшін берілген мемлекеттік көмек көлемі 1,1 млрд теңгеден асты.
Дереккөз: egemen.kz
Фото: Төтенше жағдайлар министрлігі