Құрбан айт – ұлық мейрам!
Қазақ радиосының тікелей эфирінен берілетін «Ықылас» бағдарламасында «Әлжан ана» мешітінің наиб имамы Жақия Мерей Қанатұлы қонақта болды.
Бүгінгі қасиетті жұма тақырыбы, жұма уағызы «Құрбан айт» жайында сөз қозғалды. Құрбан айт – Ибраһим пайғамбардың құрбандығының құрметіне және қажылықтың аяқталуына байланысты атап өтілетін исламдағы ең үлкен мерекелердің бірі. Исламдағы басқа да маңызды оқиғалар сияқты Құрбан айт күні хижраның ай күнтізбесі бойынша есептеледі. Сондықтан Құрбан айт мерекесі жыл сайын әр түрлі күндерде атап өтіледі.
Құрбандық шалу – құдайға ризашылық білдіру белгісі. Көбінесе мұсылмандар құрбандыққа қошқар немесе қой шалады, кейде ешкі шалып жатады. Ал Арабия түбегіндегі елдер түйе шалады. Әдетте, бір отбасы құрбандыққа бір жануар шалады. Құрбандыққа шалынатын қой немесе қошқар алты айдан асқан ересек, сау, тамақтандырылған және көрінетін кемшілігі жоқ мал болуы керек. Бұл ережелерді Пайғамбардың өзі айтқан және әр мұсылман оларды қатаң ұстануы тиіс.
Құрбан айт үш күн бойы атап өтілгендіктен, құрбандықты мейрамның кез келген күнінде шалуға болады. Ал етті бірнеше бөлікке бөледі, бірақ теңдей бөлу міндетті емес. Бірінші бөлік кедейлерге қайырымдылық ретінде бүкіл қауым атынан таратылады. Екінші бөлік көршілер мен туыстарына дәм тату ретінде беріледі. Ал үшінші бөлікті өздеріне және отбасы мүшелеріне қалдырады.
Құрбан айттың мерекелік дастарханы бай және мол. Өйткені үстелдегі тағамдар құдайға деген ризашылықтың белгісі. Дәстүрлі ет тағамдарынан бөлек, дастарханда пісірілген тағамдар, тәттілердің барлық түрлері және шай мен кептірілген жемістер де тұрады.
Құрбан айтта міндетті түрде тәкбір намазы оқылады. Тәкбір «Алла Ұлы!» деген сөздерден тұрады, оны мешітке барар жолда да оқу керек. Құрбан айт үлкен намаздан басталады. Құлшылық етушілер таңертең ерте тұрып, намазға жиналады, содан кейін имам үлкен уағыз оқиды. Осылайша, мешітке барғаннан кейін тікелей Құрбан айт мерекесі басталады.
«Ықылас» бағдарламасын әр жұма сайын сағат 10:15-те Қазақ радиосынан тыңдай аласыздар.