Ой, қарағай

Ой, қарағай

   халық әні

Дүние өтеріңде сынаптайсың,

Таулардан жылжып аққан бұлақтайсың.

Ой, қарағай,

Жастық өтіп барады-ай,

Кәрілік келді жағалай.

Басынан талай ердің аттай теуіп,

Сұм жалған, қайда барып тұрақтайсың.

Ой, қарағай,

Шауып өткен марал-ай,

Жастық өтіп барады-ай.

Дүние қудым сені жалықпай-ақ,

Судағы ұстатпайсың балықтай-ақ.

Ой, қарағай,

Шауып өткен марал-ай,

Жастық өтіп барады-ай.

Біреуге мал мен бақты қатар беріп,

Біреуді қойдың, құдай, жарытпай-ақ.

Ой, қарағай,

Жастық өтіп барады-ай,

Кәрілік келді жағалай.

Ой, қарағай,

Шауып өткен марал-ай,

Жастық өтіп барады-ай.