Telegram-бот арқылы дәрігер қабылдауына жазылуға болады
@ЕGov.kz порталы Telegram-бот арқылы жаңа үш қызметті ұсынады, деп мәлімдеді «Ұлттық ақпарат технологиялары» АҚ баспасөз қызметі.
«Ұлттық ақпараттық технологиялар» АҚ @EgovKzBot Telegram-ботында Денсаулық сақтау министрлігінің үш қызметінің іске қосылғанын хабарлайды.
Енді Telegram көмегімен азаматтар келесі қызметтерді сұрай алады:
- Емханаға тіркелу;
- Дәрігер қабылдауына жазылу;
- Дәрігерді үйге шақыру.
Қызметтерге қол жеткізу үшін «Мобильдік азаматтар базасына» тіркелу, яғни @EGov.kz порталындағы жеке кабинетке телефон нөміріңізді жазу қажет. Сосын өз гаджетіңіздегі Telegram мессенджерінде ботты іске қоссаңыз жетіп жатыр.
Бот көмегімен келесі қызмет түрлері де ұсынылады:
• Жылжымайтын мүлікке тіркелген құқықтар туралы анықтаманы алу;
• Әлеуметтік мәртебені тексеру;
• Мемлекеттік базалық зейнетақы төлемінің мөлшері туралы ақпарат алу;
Естеріңізге салсақ, 21 мамырда «ҰАТ» АҚ Басқарма Төрағасы Әсет Тұрысов 4 ең танымал қызметтерді (мекенжай анықтамасы, жылжымайтын мүлік туралы анықтама, сотталмағаны туралы анықтама, жеке тұлғаның заңды тұлғаларға қатысы туралы анықтама) жеңілдетілген түрде алуға мүмкіндік беретін Telegram-боттың іске қосылғанын хабарлаған.
@EgovKzBot көмегімен қызметтерді пайдалану кезінде туындаған сұрақтарды тәулік бойы тегін кеңес беретін 1414 Бірыңғай байланыс орталығына жолдауға болады.
Дереккөз: egov.kz