Нұр-Сұлтан - 101,4FM

Елордада жалға берілетін тұрғын үй бағдарламасының нәтижелері жарияланды

Елордада жалға берілетін тұрғын үй бағдарламасының нәтижелері жарияланды

2022 жылдың 1 қаңтарынан бастап ең төменгі жалақы мен айлық есептік көрсеткіштің (АЕК) артуына байланысты міндетті әлеуметтік медициналық сақтандыру (МӘМС) үшін төленетін жарналар мен аударымдар мөлшері өзгереді. Бұл туралы «Әлеуметтік медициналық сақтандыру қорының» Нұр-Сұлтан қаласы бойынша филиалының баспасөз қызметі хабарлады. Жұмыс беруші қызметкер үшін оның жалақы деңгейінің 3%-ын төлейді, бірақ 18 000 теңгеден аспайды. Қызметкерлер, оның ішінде азаматтық-құқықтық сипаттағы шарттар бойынша табыс алатындар өз табысының 2%-ын, бірақ 12 000 теңгеден аспайтын мөлшерде, төлейтін болады. Жеке кәсіпкерлер және жеке практикамен айналысатын адамдар – Ең Төменгі Жалақының 1,4 еселенген мөлшерінің 5%-ын немесе 4 200 теңге төлейді.

*****

Нұр-Сұлтан және Алматыда ірі есірткі тасымалының жолы кесілді. Қаржылық мониторинг агенттігінің мәліметінше, есірткі заттары халықаралық арналар арқылы жақын шет елдерден халық тұтынатын әртүрлі тауарлар түрінде жеткізілген. "Шағын мөлшерде өлшеп оралған есірткі заттары Нұр-Сұлтан және Алматы қалаларында саябақтарының, мектептерінің, ауруханаларының, мектепке дейінгі мекемелердің аумағында "жер астына салынған зат" түрінде таратылған", - делінген хабарламада. Сату анонимді Telegram-каналдар арқылы жүргізілді, төлем Qiwi-кошелек электронды төлемдер арқылы қабылданды. Негізгі сатып алушылар Қазақстанның кәмелетке толмаған азаматтары болды. ҚК 286-бабының 2-бөлігі және 297-бабының 3-бөлігі бойынша қылмыстық іс қозғалды. Есірткі сақтағаны және сатқаны үшін бес қылмыскер ұсталды.

*****

Елордада 2021 жылға арналған «Жұмыс істейтін жастарға сатып алу құқығынсыз жалға берілетін баспана» тұрғын үй бағдарламасының нәтижелері жарияланды. Бағдарлама бойынша өткендердің арасында екі көппәтерлі тұрғын үйде орналасқан 800 пәтер бөлінеді. Биыл бағдарламаға қатысуға 4863 адам өтінім берді, олардың 800-і жақын арада пәтер кілтін алады. Айта кетейік, Нұр-Сұлтанда бағдарлама бойынша өткендердің тізімі zhilfond.kz сайтында жарияланған. 213 пәтер Кенесары және Сембинов көшелерінің қиылысында, тағы 587 пәтер Абылай хан, Б.Момышұлы және Р.Қошқарбаев даңғылдарының қиылысында орналасқан. Бағдарламаның барлық қатысушыларына "Іріктеуден өтті", "Резерв" немесе "Бас тартылды" деген смс-хабарламалар жіберілді.