Астанада балалар арасында шайбалы хоккейден турнир өтеді

28-31 наурыз аралығында елордада «SAMRUK BALA CUR» балалар мен жасөспірімдер командалары арасында шайбалы хоккейден турнир өтеді.

Астана әкімдігінің ресми сайтының хабарлауынша, бұл Қазақстан өңірлерінің ауылдық командалары арасында жоспарланған ірі хоккей жарыстарының үшінші турнирі.

Аталған додаға Шығыс Қазақстан, Қарағанды, Павлодар, Атырау, Ақтөбе облыстарынан, сондай-ақ Астана мен Алматыдан 24 команда қатысады. 300-ден астам бала, оның ішінде Ақкөл балалар үйінің тәрбиеленушілері қатысады деп күтіліп отыр.

Турнир Астана қаласы әкімдігінің және «Самұрық-Қазына» АҚ қайырымдылық қызметінің бірыңғай операторы «Samruk Kazyna Trust» қорының қолдауымен «Altyn Shaibaly» балалар хоккейін дамыту жобасы аясында өтіп жатыр. Осылайша, спорттық іс-шара Қазақстандағы балалар хоккейінің тарихындағы ең ірі турнирлердің біріне ғана емес, сонымен қатар өңірлердегі балалар үшін ең қолжетімді турнирлердің біріне айналды.