Мемлекет басшысы қазақстандықтарды халықаралық балаларды қорғау күнімен құттықтады

Cурет: Stan.kz

Мемлекет басшысы Қасым-Жомарт Тоқаев қазақстандықтарды халықаралық балаларды қорғау күнімен құттықтады. Ол бұл датаны ерекше қуаныш пен мейірімге толы шуақты мейрам деп атады. «Баланың күлкісі мен бақытынан артық ештеңе жоқ екенін осы мерекеде бәріміз айқын сезінеміз.  Өскелең ұрпақтың жан-жақты дамуына қолайлы жағдай жасау – мемлекетіміздің басты міндетінің бірі. Біз заманауи мектептер мен жайлы балабақшалар салып, инновациялық орталықтар, оқушылар сарайларын және спорт кешендерін ашып жатырмыз. Үйірмелер мен секциялар да  ұйымдастырылған», – деді Қасым-Жомарт Тоқаев. Президент сондай-ақ, "Балалар жылы" аясында көптеген жаңа жобалар қолға алынғанын атап өтті. «Әрбір баланың талабын ұштап, дарынын ашуды көздейтін түрлі іс-шаралар жүзеге асырылуда. Мемлекет жылдан жылға бұл бағыттағы жұмысты күшейте түседі. Өйткені, жас ұрпақтың мықты азамат болып өсуі  еліміздің тұрақты дамуына және баянды болашағына жол ашады», – деді мемлекет басшысы.