Атырауда Ұлттық домбыра күнінде бір мезетте 1000 оқушы күй тартады

Атырауда Ұлттық домбыра күнінде мың оқушы күй тартпақ. Атырау облыстық мәдениет және тілдерді дамыту басқармасының мәліметінше, 7 шілде күні Исатай-Махамбет орталық алаңында «Шанақтан шарықтаған шартарапқа» мәдени іс-шарасы өтеді.
Аталмыш концерттік бағдарламада 1 000 оқушы домбыра шертеді. Айта кетейік, өнерпаздардың бәрі домбыра үйірмесіне қатысады.
Орталық алаңда сондай-ақ күй өнері саңлақтарының есімі берілген жергілікті екі оркестр өнер көрсетеді. Оның бірі – күйші, композитор, Құрманғазының шәкірті Дина Нұрпейісованың атымен аталатын академиялық қазақ халық аспаптары оркестрі. Ал, екіншісі – Н.Жантөрин атындағы облыстық филармонияның құрамындағы «Нарын» халық аспаптары оркестрі. Аталған өнер ұжымына күйші, композитор Қаршыға Ахмедияровтың есімі берілген.