Қазақ музыкасының партитурасы Гарвард университетінің қорына табысталды

Қазақ әндері Гарвард университетінде орындалып, күй партитуралары әйгілі білім ордасының Әлем музыкасы мұрағатына табысталды. Қазақстанның Нью-Йорктегі бас консулдығы мен скрипкашы Владимир Дё ұйымдастырған іс-шарада америкалық музыканттар «Япурай», «Назқоңыр» сынды халық әндерімен қатар Қуат Шілдебаев, Евгений Брусиловский, Ғазиза Жұбанованың шығармаларын орындады. Шараға Гарвард университетінің мамандары мен студенттерінен бөлек, Бостондағы қазақ диаспорасы қатысты.
Аталмыш кеште халық әндерінен бастап ХХ ғасырдың композиторларының шығармалары батыстық ішекті аспаптарда тың нұсқада тыңдарманға жол тартты.
Концерт аясында қазақ күйлерінің партитурасы Гарвард университетінің әлем музыкасы мұрағатына табысталды. АҚШ-та тұңғыш рет жарық көрген күй ноталары скрипканың соло орындауына және өзге де ішекті аспаптардың мақамына сәйкес етіп жасалған. Бұл арқылы отандастарымыз білім ордасының музыка саласының ғалымдарына тың олжа ұсынып, Ұлы дала ән-күйімен тереңірек танысуға мүмкіндік сыйлап отыр.
Гарвардтағы іс-шара қазақ өнерін АҚШ-та дәріптеудің жаңа бір кезеңі десе болады. Игі бастама қос елдің өнер саласындағы ынтымақтастығын нығайта түсетіні анық.