«Астана Опера» Жұмысшы мамандықтар жылы аясында Ақтөбеде гастрольмен өнер көрсетеді

«Астана Опера» театрының опера труппасы және оркестрі Ақтөбеге гастрольге аттанады. Елордалық артистар 11 сәуірде «Өнер орталығы» концерт залының сахнасында «Астана Опера» жұлдыздары» гала-операсын, сондай-ақ жас көрермендерге арналған «Музыка бейнелейді және әңгімелейді» концертін ұсынады. Гастроль ҚР Мәдениет және ақпарат министрлігі мен Eurasian Resources Group жетекші халықаралық өнеркәсіптік компаниясының қолдауымен өтеді.
Гала-опера М.Төлебаевтың «Біржан – Сара» операсынан Айтыс сахнасымен ашылып, Е.Брусиловскийдің «Қыз Жібек» операсынан Шегенің термесімен, Толқыма, Гәкку және Шашу сахналарымен жалғасады. Сондай-ақ көрермендер М.Төлебаевтың «Біржан – Сара» операсынан Сараның, Ғ.Жұбанованың «Еңлік – Кебек» операсынан Еңліктің, С.Мұхамеджановтың «Айсұлу» операсынан Айсұлудың арияларын және осы операдан Серкенің каватинасын тыңдайды. Қазақстандық классиктердің туындылары, оның ішінде А.Құнанбайұлының «Көзімнің қарасы», Е.Хасанғалиевтің «Атамекен» әндері гастрольдік бағдарламаға көрік береді. Бұдан бөлек, осынау кеште И.С.Бах, Дж.Россини, Дж.Верди, Г.Доницетти, Ж.Массне, Ж.Бизе сынды шетелдік композиторлардың әйгілі туындылары да шырқалады.