Жанқош Тұраров

        Жанқош Тұраров – қазақстандық кәсіпқой боксшы, көптеген халықаралық турнирлердің жеңімпазы. 1990 жылы Жамбыл облысы, Талас ауданы, Ақкөл ауылында дүниеге келген. Бокспен 2004 жылдан бастап айналыса бастаған. 2008 жылы Алматыға келіп, кәсіпқой бокстың қыр-сырын меңгере бастайды. 2009 жылы кәсіпқой бокстағы алғашқы жекпе-жегін өткізіп, қарсыласын жеңген.
        2012 жылы кәсіпқой бокстан Қазақстан чемпионы атанады. Оған дейін Невада штатында кездесулер өткізген Жанқош Тұраровты промоутерлер байқап АҚШ-қа шақырады. Бүгінде Қанат Ислам екеуі Нельсон Лопестің қол астында жаттығады.
        Жанқош Тұраров кәсіпқой бокстағы карьерасында 66,7 килограмм салмақта 19 кездесу өткізіп, соның барлығында жеңіске жеткен. Оның 13 кездесуін уақытынан бұрын аяқтаған.
        Қаңтардың 29-ы күні Нью-Йоркте бразилиялық Хоаким Карнейромен 12 раундтық кездесу өткізіп, бірінші раунд-ақ жеңіске жеткен Жанқош Тұраров 66,7 килограмм салмақта NBA (Ұлттық бокс ассоциациясы) бойынша әлем чемпионы атағын иеленді. Қазақ спортшысы WBA (Әлемдік бокс ассоциациясы) рейтингінде өз салмағы бойынша үздік 15 боксшының қатарына енді.
        "Мен Олимпиадаға қатыспаймын. Барлық мақсатым – кәсіпқой бокста жетістікке жету", – дейді Жанқош Тұраров берген сұхбаттарында.