Ырза Тұрсынзада: Әйелің ақылды болса, төрт құбылаң түгел

«Шалқар» радиосының тікелей эфирінде өтетін «Өнеге» хабарына «Құрмет» орденінің, «Алтын сапа» сыйлығының иегері, белгілі этнограф-дизайнер Ырза Тұрсынзада қатысты.

Әжесі мен анасының тәрбиесімен бойына ұлттық салт-дәстүрді сіңіре білген студия мейманы қолөнер шеберлігіне ерекше тәнті болып өскендігін айтады. Сондай-ақ ол бағдарлама барысында ұрпақ тәрбиесіндегі әйелдің рөліне қатысты пікірін білдірді.

«Қазіргі қоғамда әйелдердің айтатын әңгімелерінде пәтуа жоқ, арзандап кеткендігі мені қатты толғандырады. Айғаным, Зере, Айша бибі сынды дана  арулардың кейінгі ұрпағы арзан әңгіме, қу дүниені айтпай, керісінше рухани азық болатын мәнді істерге ұмтылса деймін. Қазақ елінің барлық қыз-келіншектері бір-бірімен бәсекелесуді қойып, өздерін білім-іліммен, рухани байлықпен жетілдіріп отырса екен. Әйел адам білімді болса, ер азаматы да жігерлі, ұрпағы салиқалы болады. Жалпы әйелің ақылды болса, төрт құбылаң түгел деген сөз»,- дейді Ырза Тұрсынзада.

Қызықты әрі танымдық сұхбатты бағдарламаның аудионұсқасынан тыңдай аласыздар.

Бағдарламаны эфирге дайындап жүргізген хабардың авторы әрі жүргізушісі Ләззат Тиышбекқызы.