Жазушы Берік Шаханұлының дауысы "Шалқар" радиосынан берілді
«Әдебиет әлемі» хабарының кезекті санында жазушы Берік Шаханұлының шығармашылығы мен өмірдерегі жайлы тыңдайсыздар. Хабар үнтаспаға жазылып алынған.
Берік Шаханұлы жоғарғы оқу орнын бітірген соң Жамбыл облыстық «Еңбек туы» газетінде әдеби қызметкер болып жұмыс істейді. 1973-1989 жылдар аралығында «Жазушы» баспасында редактор, аға редактор 1989- 91 жылдары «Жұлдыз» журналында әдеби қызметкер болған. Одан бері біраз жерде қызмет ете жүріп көптеген шығармалар, әңгімелер жазды. «Ғашықтың тілі», «Ақ иірім», «Қаратаудың самалы» ,«Құса», «Көрген түстей дүние», «Пойызда кездескен қыз», «Қоңыр жон» әңгімелері мен повестері жарық көрген.
Сарысу ауданы Жайылма ауылының құрметті азаматы, Халықаралық «Алаш» сыйлығының иегері, ҚР Тәуелсіздігіне 10 жыл мерекелік медалімен, «Ерен еңбегі» үшін медалімен марапатталған жазушы Берік Шаханұлының артында өшпес мол мұра қалған.
Асылымызды ардақтау мақсатында санамызда сақталып, жадымызда жатталып қалған жазушының шынайы шығармаларын оқырман қауымға қаз қалпында жеткізу біздер үшін ниет-қарыз, адами парыз болмақ. Қазақстанның еңбек сіңірген қайраткері, жазушы Берік Шаханұлымен көзі тірісінде сұхбаттасып, дауысын жазып алған болатынбыз. Реті келгенде назарларыңызға ұсынуды жөн көрдік.
Хабарды әуенмен әрлеп, дыбысын қадағалаған Жадыра Сардарбекқызы.
Хабардың толық нұсқасын аудиодан тыңдай аласыздар.
Хабардың редакторы: Айнұр Шамшейт.