Қазақ радиосының 95 жылдық мерейтойы 28 қыркүйекте тойланады
28 қыркүйекте Астана қаласында ұлттың үнжарғысы – Қазақ радиосының 95 жылдық мерейтойына арналған шаралар өтеді.
Сағат 10:00-де «Казмедиа орталығында» «Халықаралық байланыстар орнатудағы ұлттық радионың рөлі» атты халықаралық ғылыми-тәжірибелік конференция ұйымдастырылады. Шараға мемлекет және қоғам қайраткерлері, зиялы қауым өкілдері, отандық БАҚ жетекшілері мен ардагер журналистер, сонымен қатар, Қазақ радиосымен әріптестік байланыс орнатқан шетелдік телерадио мекемелерінің жетекшілері қатысады.
Ал, сағат 16:00-де «Казмедиа орталығының» киноконцерт залында IV Халықаралық «Ұлы Дала дауысы» радиофестивалінің гала-концерті басталады.
Қазақ радиосының төл туындысы - «Ұлы дала дауысы» радиофестивалі 2012 жылдан бастап дәстүрлі түрде ұйымдастырылып келеді. Биыл ән додасына Қазақстан, Түркия, Ресей, Украина, Беларусь елдерінен 60 үміткер қатысты. Олардың 16-ы жеңімпаз деп танылды.