«Дон Карлос» тарихи операсындағы жаңа дауыстар

«Астана Операда» Джузеппе Вердидің «Дон Карлос» монументалды операсында керемет жас солистердің бірқатар дебюттері орын алды.
Атап айтқанда, Талғат Аллабиринов алғаш рет Герольдтың рөлін таныстырды. Сондай ақ бұл бейнеде оның әріптесі Артур Ғабдиев дебют жасады, ал Ұлы инквизитордың бейнесінде сахнаға алғаш рет Шыңғыс Расылхан шықты.
Классикалық опера жауһары көрермендерге театрдың Үлкен залы сахнасында спектакльдің қоюшы дирижері, «Астана Операның» бас дирижері, Қазақстанның еңбек сіңірген қайраткері, ҚР Мемлекеттік сыйлығының лауреаты маэстро Алан Бөрібаевтің жетекшілігімен ұсынылды. Өнер көрсетуге елордалық театрдың опера солистері, симфониялық оркестрі, хоры, балет артистары мен мимансы қатысты.
«Астана Операда» біртуар композитор Джузеппе Вердидің көлемді операсының қоюшы режиссері әрі сценографы ретінде италиялық режиссер Давиде Ливермор тер төкті. Ауқымды хор сахналарымен театрдың бас хормейстері, Қазақстанның еңбек сіңірген қайраткері Ержан Дәуітов жұмыс істеді.