Әділбай Тобыш : «Әншілер үлкен аманатты арқалап жүр»
Қазақ халқы бағзы заманнан келе жатқан ән өнерін ерекше бағалайды. Ұлт тарихында қасиетті өнердің биік шыңына жетіп, халықтың ілтипатына бөленген, төл өнерімізді дәріптеген талант иелерінің орны қашанда асқақ. Ал бүгінгі ән өнеріне аға буынның көңілі толмай, сыни пікір жолдап жататынын жиі естиміз. Осы турасында ашық сұхбат беріп, өз ойын білдірген қазақ өнерінің қайраткері, әнші, сазгер Әділбай Тобыш «Қазақ радиосының» «Армандастар» хабарының қонағы болды.
«Тыңдаушы – тобыр. Сол тобырды тонаушылар көбейді. Сахнадағылар үлкен аманатты арқалап жүргендерін сезіну керек. Қазақта «әсіре қызыл тез оңар» деген сөз бар. Қазіргі әндер де, әншілер де бір кигеннен жылтырағы түсіп қалатын көйлек секілді», - дейді фонограммамен ән айтатындарды сынаған Әділбай Тобыш.
«Бассам да бәтеңкемді сіресінен,
Қайтпаймын өнер үшін күресуден.
Қазаққа бұлбұл болды сауысқандар,
Домбыра асқақ үнің артта қалды,
Тыңдаушы есі бүтін ауысқандар», - деген өлең жолдарын да мысалға келтірді Әділбай сері.
«Қазақстан Республикасының халық әртісі Жәния Әубәкірованың қуанышында «Алқоңырды» әуелеткенімде америкалық дирижер Дориан Уилсон таңғалып, бес минут бойы тамағымнан ұстап тұрған еді», - дейді биік өнерді қастерлейтін студия қонағы.