Әке – отбасының тірегі, ақылы, күші. Алайда, іс жүзінде әкенің рөлі мен беделі қалай қалыптасады?

Қазақстан Республикасының еңбек сіңірген қайраткері, Қ.Қунышбаев атындағы қазақ мемлекеттік академиялық драма театрының әртісі, белгілі әнші Нұркен Өтеуіл Қазақ радиосының «Ақ отау» бағдарламасына берген сұхбатында отбасындағы әкенің беделін қалыптастыратын анасы екенін айтады.

« Менің әкем сырт көзге қарағанда өте қатал кісі көрінеді. Бірақ балажан, соншалықты мейірімді әрі пейілі кең адам. Әкемді анам арқылы таныдым. Олай дейтінім, әкемнің беделін анам қалыптастырды. Әкемізден қорқып, анығын айтқанда аяқ тартып өстік. Анамыз «Әкең келе жатыр» дегенде кәдімгідей қорқатынбыз. Менің идеалым әкем болды. Ол кісіге деген құрметті анамыз тәрбиемен сіңірді...» дейді актер.