Әкемнің беделін анам қалыптастырды
Әке – отбасының тірегі, ақылы, күші. Алайда, іс жүзінде әкенің рөлі мен беделі, қадірі қалай қалыптасады?
"Қазақстанның еңбек сіңірген қайраткері", Қ. Қуанышбаев атындағы Мемлекеттік академиялық қазақ музыкалық драма театрының артисі, белгілі әнші Нұркен Өтеуіл Қазақ радиосының «Ақ отау» бағдарламасына берген сұхбатында отбасындағы әкенің беделін қалыптастыратын ана екенін айтты.
« Менің әкем сырт көзге өте қатал көрінетін. Бірақ балажан, соншалықты мейірімді әрі пейілі кең адам. Әкемді анам арқылы таныдым. Олай дейтінім, әкемнің беделін анам қалыптастырды. Әкеміздің айтқанын екі етпей, зыр жүгіретінбіз. Анамыз «Әкең келе жатыр» дегенде кәдімгідей қорқатынбыз, дұрысын айтқанда сыйлағанымыздан ғой. Менің идеалым әкем болды. Жалпы, ол кісіге деген құрметті анамыз тәрбиемен бойымызға сіңірді...» дейді бағдарлама қонағы.