Әнші Жамал Омарова қоңыр дауысымен мәскеуліктерді таң қалдырған

Омарова Жамал (1912-1976) — әнші (контральто). Қазақстанның халық артисі. Өзбек ССР-нің Янгиюль қаласында туған.

Мектеп қабырғасында-ақ тамылжыта ән салып, көзге түсе бастаған әншінің өнері жайлы Қазақ радиосындағы «Ән домбыра»  бағдарламасында айтылды. 

Ташкент педагогикалық училищесінде оқу бітірген. Ж. Омарова қазақ ұлттық операсымен ән мәдениетін дамытуға үлкен үлес қосты.

Ол 1934-1936 жж. музыкалық драмалық спектакльдерден Мақпал (Б. Майлиннің “Шұғасы”), Қамқа (Ғ. Мүсіреповтың “Қыз Жібегі”), Айман (М. Әуезовтің “Айман-Шолпан”) образдарын жасады.

1937-1976 жж. - Қазақконцерт пен қазақ филармониясының солисі. Оның репертуарында «Бипыл», «Қараторғай», «Ертіс», «Ләтипа», «Шынарай» сияқты қазақтың халық әндері, Ш. Қалдаяқовтың «Менің Қазақстаным», А. Телғозиевтің «Менің елім» және т. б. әндері бар.

Ж. Омарованың орындауында қазақтың халық шығармашылығына ұлттық сипаттар, оның әуезділігі, фольклорлық жанрдағы патетика тән.