Айдын Байыс: Мен армандаған әдеби орта 60 жылдардағы Алматыда еді...
Айдын Байысты әдеби ортадан көп кезіктіре алмайсың. Себебі, қаламгер бос уақытын кітапханада өткізгенді дұрыс көреді.
Табиғатта серуендеп, жалғыз жүрген сәттер жас ақынның жан қалауы. Оның ойынша, поэзия - жалғыздықта жазылады.
Бірақ, қаламгер «жалғыз шапқан ат жүйрік болмайтынын» біледі. Сондықтан, қатарластарымен санасады, аға буыннан ақыл сұрайды.
Бұл туралы ақын Қазақ радиосындағы «Қауырсын ғалам» бағдарламасында айтты.
«Мен аңсаған әдеби орта 60 жылдардағы Алматы еді. Сол сәт қазақ әдебиетінің алтын дәуірі. Қазіргі біздің әдеби ортаны бұрынғымен салыстыруға келмейді. Жермен көктей. Бірен-саран ағаларым бар, ақыл сұрайтын. Сіңіп кеттім деп айта алмаймын»,- дейді жас ақын.
Айта кетейік, Айдын Байыс – 1994 жылы Қарағанды облысы, Балқаш қаласында дүниеге келген. 2016 жылы Л.Н.Гумилев атындағы Еуразия Ұлттық университетінің Көлік-Энергетика факультетін тәмамдаған. Өлеңдері «Балқаш аймақтық ақындар антологиясына», «Арқадағы арда жыр» жинақтарына енген.