Жарты сағатта жазылған әндер...

Танымал «Дос-Мұқасан» ансамблінің әрбір әні халық жадында жақсы сақталған. Тыңдарман топтың барлық туындысын әрдайым қосыла шырқайды.

Танымал шығармалардың ішіндегі «Той жыры» мен «Қуанышым менің» туындысының тарихы қандай? Бұл әндер қай уақытта жазылды? Қаламгерге әсер еткен қандай оқиға?

Ол туралы «Шалқар» радиосындағы «Алматы түні» бағдарламасында ұлттық жаратылыстану ғылымдарының академигі, профессор Ұлықпан Сыдықов айтты.

««Той жыры» әнінің сөзін Досым Сүлееев, әнін өзім жаздым. Ортамызда бірінші болып отау тіккен  Мұрат пен Сәбираның тойына жасаған сыйымыз болатын.  Ән жарты сағатта жазылды. Содан бері туындының бірде-бір сөзі, нотасы өзгерген жоқ»,- дейді студия қонағы.  

Ғашықтардың әнұранына айналған «Қуанышым менің» әнінің  жарыққа шыққанына қырық жылдан асты. Әннің әуенін Мұрат Құсайынов жазған.

««Менің аспирантурада оқып жүрген кезім еді.  Үйленгенмін, екі балам бар. Отбасымды асырау қажет болатын.  Кейіншегім бала тәрбиесімен  үйде отырды. Жалданып жұмыс істеймін. Жұмыс барысында бажаммен сөз жарыстырып қалдық. Оның пікірінше,  «Махаббат - үйленгенге дейінгі сезім»  екен. Тіл маманы болғандықтан - барлық дастан, қиссадан мысал келтіріп, өз ойын айтты. Осы пікірталастан кейін өз көзқарасымды әнмен жеткізуге тырыстым.  Бір жағынан өзімнің жарыма да арнап жаздым деуге болады. Бұл - үйленгеннен кейін де махаббатың бар екенін дәлелдейтін, 1974 жылы жарыққа шыққан ән болды. Туындымды «Дос-Мұқасан» тобы шебер орындады», - дейді Ұлттық жаратылыстану ғылымдарының академигі, профессор Ұлықпан Сыдықов.