Қанат Ислам жастарды қолдауға шақырды

Қанат Ислам жастарды қолдауға шақырды

Қазақстан Республикасының Тәуелсіздік күні мерекесіне орай, Астанада, "Дәулет" спорт кешенінде олимпиада чемпионы Бахтияр Артаевтың қолдауымен кәсіпқой бокс кеші өтеді.  Қазақстандық кәсіпқой боксшы, әлем чемпионы, WBA FedeCaribe тұжырымының чемпионы Қанат Ислам бокс кешіне жастарға қолдау көрсету үшін арнайы келді.

Бүгін "Шалқар" радиосына сұхбат берген Қанат Ислам бұл бокс кешінің маңызы мен мақсаты жайлы былай деді:

«Тәуелсіздік күніне орай өтетін жекпе-жектің негізгі мақсаты – қазақ еліндегі кәсіпқой боксты дамыту. Әуесқой бокстан ел ішінде өтетін чемпионатқа әр облыстан кемінде 4-5 мың жас қатысады. Қазақстан біріншілігіне 200 адам қатысса, соның 30-дан астамы ғана құрамаға ілінеді. Ал қалған жігіттер 4 жылға дейін бос жүреді деген сөз. Ұсақ-түйек ауыл арасындағы жарыстарда ғана төбе көрсетеді. Солардың арасынан бірнешеуі ғана олимпиадаға барса, қалғандары қайтеді? Күзетші болады, көшеге шығады... Не істейді басқа? Олардың бәрінде бірдей Америкаға шығу мүмкіндігі жоқ. Жастар үшін бұл тым қол жетпес дүние. Неге сол талантты інілеріміз әлемдік сұранысқа ие кәсіпқой бокста жүрмейді? Тәуелсіз еліміздің арқасында біз өзімізді, елімізді әлемге таныта аламыз, бізде мүмкіндік көп. Сондықтан біз кәсіпқой бокста да мемлекетіміздің айбынын асқақтатып, көк туымызды биікке көтеруіміз керек. Осы мақсатта өсіп келе жатқан жастарға қолдау көрсетіп, олардың жағдайын жасау – біздің міндетіміз».