«Тапқыр бала» – бірегей жоба
Қазақ радиосында балаларға арналған жаңа жоба – «Тапқыр бала» интерактивті радиоойыны.
Бүгінгі жаһандану дәуірінің басты талабы – өркениетті қоғамға ілесе алатын білімді, отансүйгіш, текті ұрпақ тәрбиелеу. Жан-жақты, ұлттық тәрбиемен сусындаған, ана тіліне жатық, салт-дәстүріне берік ұрпақ – тәуелсіздікті нығайтады, болашақты гүлдендіреді. Оған қол жеткізудегі алғы шарттардың бірі – ұлттық тәрбиеге арқа сүйеу. Ал ұлттық тәрбиенің негізі ана тілін, салт-дәстүрін дұрыс меңгеруден басталатыны анық. Осы бағытта жұмбақ, мақал-мәтел, жаңылтпаштардың атқарар рөлі зор.
Жаңылтпаш – жас ұрпақтың тілін ұстартып, әр түрлі сөзді шапшаң айтуға үйретеді. Қазақ балалар өлең-ойындарының iшiнде салмақты орын алатын тәрбиелiк мәнi жоғары, көркемдiк кестесi де күрделi жанр. Ал жұмбақтар – балалардың ойлау қабілетін дамытып, тәрбиелеумен қатар, олардың бойына өз халқының игілігін дарытып, ана тілінде ойлауға, мәдениетті сөйлеуге және сауатты жазуға әсерін тигізеді. Мақал-мәтелдер балаларға терең ой салумен қатар, оларды көркем және образды сөйлеуге жаттықтырады, сөз байлығын, сөздік қорын байыта түседі. Балаларға арналған «Тапқыр бала» радиоойыны осы бағытта, яғни, балаларды ана тіліміздің қыр-сырын терең меңгеруге, әдеби тіл нормаларын сауатты игеруге, ойын көркем де бейнелі жеткізуге баулиды.
Бағдарлама барысында 3 кезең бойынша, жұмбақ, жаңылтпаш, мақал-мәтелмен байланысты ойындар ойнатылады. Ойын жеңімпаздарына «ҚАЗАҚ РАДИОЛАРЫ» арнайы сыйлықтар ұсынады.
Радиоойын әр сенбі сайын сағат 12:05-12:35 аралығында Қазақ радиосының тікелей эфирінде өтеді. Балалар 87172 757275 нөміріне хабарласып, ойынға қатыса алады.
Бағдарлама авторы әрі жүргізушісі: Нұрсәуле Мамытхан.