Солтүстік Қазақстан облысында көктемгі су тасқыны басталды

Рамазан айы кезінде Елорда тұрғындары садақа беру және ауызашар жеткізу мәселелері бойынша 109 нөміріне хабарласып, кеңес ала алады, деп хабарлайды ҚазАқпарат. Бұл туралы Нұр-сұлтан қаласының Дін істері басқармасының басшысы Нұрдәулет Әлмұханов мәлім етті. «Елорда мешіттеріндегі санитарлық-эпидемиологиялық жағдайға байланысты құптан, тарауық намаздары мен жұма намаздары өткізілмейтіні туралы хабарлағым келеді. Сондай-ақ ауызашарды ұжымдық түрде өткізуден бас тартуды сұраймыз», - деді басқарма басшысы. Оның сөзінше, Дін істері басқармасы мемлекеттік органдармен және Қазақстан мұсылмандары діни басқармасының филиалдарымен бірлесіп Рамазан айына тиісті дайындық жұмыстарын жүргізуде. «109 орталықтандырылған нөмірі арқылы елорда тұрғындары мен қонақтары Рамазан айын өткізу және жалпы дін мәселелері бойынша өз сұрақтарын қоя алады.

*****

Сәуір айында Алматыға шамамен 400 мың доза вакцина жеткізіледі деп жоспарланып отыр. Бұл туралы Алматы қалалық қоғамдық денсаулық сақтау басқармасының бастығы Нариман Табынбаев айтты, деп хабарлайды ҚазАқпарат. Оның айтуынша, Алматыда коронавирусқа қарсы екпені 49160 адам салдырған. 13 сәуірге дейін 69 мың вакцина жеткізіледі. Айдың соңына дейін тағы 300 мыңнан астам вакцина алу жоспарланып отыр. Бұл сан әлі нақтыланатын болады, қазір арнайы штаб құрылды. Бұл дозалардың барлығы вакцинация пункттеріне таратылады», - деді Нариман Табынбаев онлайн брифингте.

*****

Солтүстік Қазақстан облысында көктемгі су тасқыны басталды. Еріген қар суы өңірдегі екі автожолды шайып кетті, деп хабарлайды ҚазАқпарат. СҚО төтенше жағдайлар департаменті өңірдегі су тасқыны бойынша брифинг өткізді. Жол үстінен өткен судың тереңдігі 15 см, ол 45 метр жерді алып жатыр. Бұл екі жолмен де көліктер еш кедергісіз жүріп жатыр. Жол қызметкерлері тиісті жол белгілерін қойды», - дейді СҚО ТЖД бастығының орынбасары Мұрат Қанғожинов. Департаментте жедел штаб жұмыс істеп жатыр. Кеше тұрғындардан 19 өтініш түскен. Еріген қар суы үйлерге кірмеуі үшін мотопомпалармен сорылды, экскаватормен жыралар қазылды. 

*****

Алматы облысындағы колонияда сотталғандар арасында жанжал туып, бірі көз жұмды. Бұл туралы Қылмыстық атқару жүйесі комитетінің баспасөз қызметі хабарлады. Оқиға бүгін болған. «Зардап шеккен адамға алғашқы медициналық көмек көрсетілгеніне қарамастан, оның өмірін құтқарып қалу мүмкін болмаған. 

*****

Моңғолия 1 мамырдан бастап әуе шекараларын ашады. Алайда қазіргі кезде тек вакцина толық көлемде егілген азаматтарға ғана кіруге рұқсат ету жоспарланып отыр. Бұл туралы ҚазАқпарат Моңғолияның МОНЦАМЭ агенттігіне сілтеме жасап хабарлайды.

*****

Халықаралық Savills компаниялар тобы 2020 жылдың қорытындысы бойынша тұрғын үйдің 1 шаршы метрінің орташа бағасы өте жоғары әлем қалаларын атады. Рейтингке 31 қала кірді. Жылжымайтын мүліктің 1 шаршы метрінің бағасы өте қымбат 10 қаланың тізімінде Монако көш бастап тұр. Мұнда 1 шаршы метр тұрғын үйдің бағасы – 24 млн. 500 мың теңге. . Гонконгте 20 млн. 200 мың теңге, Нью-Йоркте 11 млн 400 мың. Қымбат қалалар тізімінде Токио, Женева, Шанхай, Лондон, Сидней, Париж, Сеул қалалары бар. Рейтингке ТМД елдерінің арасынан Мәскеу кірген. Ол 19-шы орында тұр. Мұнда 1 шаршы метр үшін 5,5 млн теңге төлейсіз.