Биыл 11 мың шақырым автожол жөнделеді

Бұл туралы ИИДМ Автомобиль жолдары комитеті төрағасының орынбасары Амангелді Беков Орталық коммуникациялар қызметінің алаңында өткен баспасөз мәслихатында мәлімдеді.

Айтуынша, биыл құрылыс-монтаж жұмыстарымен 11 мың шақырымдай автожол қамтылады.

Биыл құрылыс-монтаждау жұмыстары жалпы пайдаланымдағы 11 мың шақырымнан астам автожолда жүргізілуде. Бұл – республикалық желінің 7 мың шақырымы және жергілікті желінің 4 мың шақырымы. Республикалық желі бойынша 3,6 мың шақырымда құрылыс және реконструкция жұмыстары жалғастырылады, соның 856 шақырымын аяқтаймыз, - деп атап өтті комитет басшысының орынбасары.

Сонымен қатар ол күрделі және орташа жөндеумен 3,4 мың шақырым жол қамтылады деп отыр.

Жергілікті автожолдар желісінде жөндеудің барлық түрлерімен 4 мың шақырым жол қамтылмақ, соның 3 мың шақырымы аяқталады. Жыл қорытындысы бойынша нормативтік жағдайдағы жолдардың үлесі республикалық желі бойынша 92 пайызға және жергілікті желі бойынша 87 пайызға дейін жеткізілетін болады, - деді Амангелді Беков.

Дереккөз: budport.com.ua