Радиожурналистер Тәуелсіздік күнін атап өтті

Бүгін «Қазақ радиолары» ЖШС ұжымында мерекелік жиын өтті. Серіктестіктің Бас директоры Н.Көшеров «Қазақ», «Шалқар», «Астана» және «Classic» радиоларындағы қызметкерлерді 16 желтоқсан – Тәуелсіздік күнімен құттықтады.

Сондай-ақ мереке қарсаңындағы басқосуда ҚР Кәсіподақтар федерациясының өкілдері Қазмедиа орталығына арнайы келіп, радиожурналистер – «Қазақ» радиосының аға редакторы Жанат Жанұзақты және «Шалқар» радиосының журналисі Гүлбағыш Бостанованы Федерация төрағасы С.Дәулеталиннің «Құрмет» грамотасымен марапаттады. Одан бөлек, Астана қаласы Кәсіподақтар орталығы атынан ұжымға Алғыс хат табысталды. Орталық төрағасы Т.Күнәділовтің құттықтауын орынбасары Қайрат Сұлтаналин жеткізіп, журналистер жұмысына сәттілік тіледі.

«Сіздер кәсіби шеберліктеріңізбен, тартымды үн өрнегі бар дауыстарыңызбен, шығармашылық көзқарастарыңызбен түрлі бағдарламалар мен хабарлар ұсынып, «Қазақ радиосының» миллиондаған тыңдаушыларына маңызды оқиғалар туралы хабардар етіп қана қоймай, қоғамдық пікірді қалыптастырып, ұлттық дәстүрлер мен құндылықтарды қолдап, қазақ тілі мен мәдениетінің дамуына ықпал етесіздер» - делінген құттықтауда.

Қайрат Сұлтаналин өз сөзінде «ҚР Кәсіподақтар федерациясына» биыл 35 жыл толғанын тілге тиек етті.



Материалды дайындған: Бейбарыс Сәкенұлы