Ұлу жылы ұтымды жыл болды
«ҚАЗАҚ РАДИОЛАРЫ» ЖШС үшін ұлу жылы табысты болды. Жыл басынан бері радиоарналардың бағдарламалары мен музыкалық контенті тұрақты түрде жаңарып отырды.
Мәселен, серіктестікке қарасты «Қазақ» радиосының эфирлік кестесі айтарлықтай өзгеріп, дәстүрлі әндермен қатар заманауи музыка да көптеп беріле бастады. Хабарлардың хронометражы азайып, түрлі саланы қамтитын ақпараттық-танымдық контентке басымдық берілді. Әуе толқынындағы имиджік роликтер мен эфирдің музыкалық безендірілуі толықтай қайта жаңғырды. Тікелей эфирлердің саны артып, түрлі жастағы тыңдарман талғамына сай келетін жобалар жарыққа шықты. Осы жұмыстардың арқасында еліміздегі барлық радиоарналар арасында «Қазақ» радиосының рейтингі еселеп өсіп, 9 орыннан 4 орынға көтерілді.
Имидждік, әлеуметтік жобалар да назардан тыс қалған жоқ. Алғыс айту күніне орай Астанадағы «Қазмедиа» орталығында дәстүрлі «Мың алғыс» шарасы ұйымдастырылды. Биыл өткен футболдан Еуропа чемпионатының матчтарынан қолма-қол трансляциялар жасалды. Ал Astana Media Week апталығында «Қазақ» радиосы көшпелі студия құрып, 2 күн бойы тікелей хабар таратты.
«Шалқар» радиосында жаңа хабарлар ашылып, арна ұлттық бағыттан айныған жоқ. «Қазақ» пен «Шалқардың» контенті қайталанбай, жеке дара бағыт алды. Тікелей эфирдегі хабарлардың саны артты.
Жастардың жан серігіне айналған «Астана» радиосы да жаңа маусымда тың жобалармен эфирге шықты. Star Way продюссерлік орталығымен бірлесіп, «SUMMER fest» музыкалық фестивалін өткізді.
«Classic» радиосы да жыл басынан хабарларды жаңартып, ән қоржынын толықтырып, бағдарлама кестесін байытты.
Биылғы жылы шығармашыл ұжымның еңбегі де жан-жақты бағаланды. Журналистер күні қарсаңында 4 әріптесіміз Президенттің атынан баспана алды. 10 бірдей қызметкеріміз «Қазақстан» телерадиокорпорациясы басқарма төрайымының Алғыс хаты пен Құрмет грамотасына лайық болса, 2 адам «Еңбек ардагері» медалі мен «Күміс жаршы» төсбелгісін тақты. Ал ҚР Парламенті Сенаты өткізген «Парасат» байқауында Алмас Байдрахманның бағы жанса, «Аманат» медиасыйлығында Азамат Тілепов үздік болды. «Үркер» сыйлығын Қымбат Досжан жеңіп алды.
Келе жатқан Жаңа жыл да жетістіктер мен жеңістерге толы болсын! Жыл бойы біздің әуе толқынымыздан табылған барша тыңдаушыға Алғыстан басқа айтарымыз жоқ. Қазақ радиоларымен бірге болыңыздар!