Активтерді қайтару: Астанада 17 млрд теңгеге жаңа стадион салынады
Қ. Мұңайтпасов атындағы ескі стадионның орнына жаңасын салуға Арнаулы мемлекеттік қордан 17,3 млрд теңге қаражат бөлу туралы шешім қабылданды.
Ескі стадион 1936 жылы салынған. Ғимарат жарамсыз болғандықтан толығымен бұзылған. Жаңа стадионның құрылысы 2025 жылдың соңында аяқталуы тиіс.
Стадион UEFA халықаралық стандарттарына сай салынады. Құрылыс аяқталғаннан кейін нысанды №8 олимпиадалық резервтегі мамандандырылған балалар-жасөспірімдер спорт мектебіне беру көзделген.
Арнаулы мемлекеттік қордан өңірлерде әлеуметтік маңызы бар 16 нысан салуға 82 млрд теңгеден астам қаржы бөлінді.