«ҒЫЛЫМ, БИЗНЕС ЖӘНЕ ӨНДІРІС ИНТЕГРАЦИЯСЫ» ФОРУМЫ ӨТТІ

2 сәуірде әл-Фараби атындағы Қазақ ұлттық университетінде Алматы қаласы әкімдігімен бірлесіп ұйымдастырылған «Ғылым, бизнес және өндірістің интеграциясы» форумы өтті.
Форумның мақсаты – инновацияларды экономика, қалалық басқару және өнеркәсіптік өндіріс салаларына тиімді енгізу үшін ғылыми қауымдастық, кәсіпкерлер мен мемлекеттік құрылымдар арасындағы ынтымақтастықты нығайту.
     Форум Farabi HUB инновациялық орталығын аралаудан басталды. Қатысушылар ҚазҰУ-дың жетекші ғылыми-техникалық әзірлемелерімен танысты. Атап айтқанда Қазақстан-Қытай жерді қашықтықтан зондтау технологиялары зертханасы; Солтүстік-Батыс политехникалық университетінің филиалы (Микроспутниктер зертханасы); RoboMech робототехника және мехатроника орталығы (Kukaроботтары); Орталық Азиядағы ең қуатты супер компьютерлердің бірі – ҚазҰУ суперкомпьютері; Технопарк және дәрілік өсімдіктер орталығы; ZTE компаниясының инновациялық орталығы; Химия, физика, биотехнология және нанотехнология саласындағы инновациялар көрмесі қатысушылардың қызығушылығын туғызды.
      Форумға қатысушыларға арнап, ҚазҰУ ректоры, филология ғылымдарының докторы, профессор Жансейіт Қансеитұлы Түймебаев алғы сөз сөйледі. Алматы қаласының әкімі Ерболат Досаев қала инфрақұрылымын дамыту, экология және цифрландыру мәселелері жөнінде баяндама жасады.
      Форум аясында ҚазҰУ мен жетекші компаниялар арасында ынтымақтастық туралы келісімге қол қойылды.
      Форум соңында ғылым, бизнес және әкімдік өкілдерінің қатысуымен панельдік пікірталас өтті. Онда қалалық орта, өнеркәсіп және тұрақты даму саласындағы өзекті мәселелерді шешу үшін ынтымақтастық мүмкіндіктері қарастырылды.