1 маусымнан бастап жүк көліктердің қозғалысына шектеу енгізіледі

Жаз мезгілінде республикалық маңызы бар автожолдарда ауыр жүк көліктерінің қозғалысына уақытша шектеулер енгізіледі. Бұл туралы «ҚазАвтоЖол» ұлттық компаниясы хабарлады. 

Бұл шаралар күннің ыстығында жол жамылғысын сақтауға және қауіпсіз қозғалысты қамтамасыз етуге бағытталған.

Шектеу мерзімі:
— еліміздің оңтүстік және батыс өңірлерінде 1 маусымнан 31 тамызға дейін;
— солтүстік және шығыс өңірлерінде 1 маусымнан 15 тамызға дейін.

Шектеулер +25°C жоғары ауа температурасы кезінде, күндізгі уақытта енгізіледі.

1 маусымнан 31 тамызға дейін сағат 10:00–22:00 аралығында келесі аймақтарда қозғалысқа шектеу қойылады:
— Алматы облысы;
— Атырау облысы;
— Жамбыл облысы;
— Жетісу облысы;
— Ұлытау облысы;
— Қарағанды облысы;
— Қызылорда облысы;
— Түркістан облысы;
— Маңғыстау облысы.

1 маусымнан 15 тамызға дейін сағат 11:00–21:00 аралығында келесі аймақтарда қозғалысқа шектеу қойылады:
— Абай облысы;
— Ақмола облысы;
— Ақтөбе облысы;
— Шығыс Қазақстан облысы;
— Батыс Қазақстан облысы;
— Қарағанды облысы;
— Қостанай облысы;
— Павлодар облысы;
— Солтүстік Қазақстан облысы.

— Шектеулер жол жамылғысын қорғау мақсатында енгізіледі, — делінген хабарламада.

Жоғары температурада асфальт жамылғысы жұмсарып, ауыр жүктемеге төтеп бере алмайды. Салдарынан жол жабыны бұзылып, ойықтар мен ақаулар пайда болады.

Жазғы шектеулерді сақтау:
— жолдардың қызмет ету мерзімін ұзартады;
— жөндеу шығындарын азайтады;
— жол қозғалысы қауіпсіздігін қамтамасыз етеді.

— «ҚазАвтоЖол» ұлттық компаниясы жүк тасымалдаушыларды белгіленген тәртіпті сақтауға және маршруттарын шектеу режимін ескере отырып жоспарлауға шақырады, — делінген хабарламада. 

https://kaz.inform.kz/news/1-mausimnan-bastap-zhuk-kolkterdn-kozgalisina-zhazgi-shekteu-engzled-1ae166/