Елімізде мемлекеттік білім беру гранттары тағайындалды

2025-2026 оқу жылына арналған мемлекеттік білім беру гранттарын тағайындау жөніндегі республикалық комиссия өз жұмысын аяқтады. Бұл туралы Ғылым және жоғары білім министрі Саясат Нұрбек айтты.

Комиссия отырыстарында үміткерлердің өтініштері қаралды.

«Биыл конкурсқа қатысу үшін шамамен 113 мың өтініш қабылданды. Талапкерлер арасында ең сұранысқа ие білім беру бағыттары – «Педагогикалық ғылымдар», «Инженерлік, өңдеу және құрылыс салалары», сондай-ақ «Ақпараттық-коммуникациялық технологиялар», - деп жазды министр Telegram арнасында.

Грант тағайындау конкурсының нәтижелері Ғылым және жоғары білім министрлігінің, Ғылым және жоғары білім министрінің, сондай-ақ Ұлттық тестілеу орталығының ресми ақпараттық көздерінде және әлеуметтік желілерінде жарияланады.

Жоғары оқу орындарына талапкерлерді қабылдау процесі 25 тамызға дейін аяқталады.

Фото: ulysmedia.kz