“Ауада күкірт иісі сезіледі“: Тараз тұрғындары зауыттан шыққан түтінге шағымданды

“Ауада күкірт иісі сезіледі“: Тараз тұрғындары зауыттан шыққан түтінге шағымданды

Тараз тұрғындары "Қазфосфат" зауытынан шыққан қою түтінге шағымданып, кәсіпорын қызметін тексеруді талап етті.

Не болды?

Тараз тұрғыны редакцияға зауыт мұржаларынан будақтап шығып жатқан ақшыл-сұр түсті түтінің видеосын жолдады.
"Қазфосфат" зауыты біздің ықшам ауданға өте жақын орналасқан. Ол бізді тура мағынасында улап жатыр. Олар сүзгілерді алып тастаған болуы мүмкін деген болжам бар. Кейде ауада күкірт иісі сезіледі", - деп жазды қала тұрғыны.
Әйел бұл мәселені шешу үшін Экология және табиғи ресурстар министрлігі тарапынан зауыт қызметіне тәуелсіз тексеру жүргізу қажет екенін айтады.
Зауыт өкілдері жағдайға қатысты не дейді?
"Қазфосфат" ЖШС бас директорының орынбасары Ерсін Сариевтің айтуынша, зауыттың тазарту қондырғылары штаттық режимде жұмыс істеп тұр.
"Өндірістік процестің технологиялық желісінде тазарту қондырғылары тұйық циклде орналасқан. Тиісінше, сүзгілер алынбайды", - деп түсіндірді ол.
Сондай-ақ Сариев сәуір немесе мамыр айында Жамбыл облысы бойынша экология департаменті тарапынан зауытты жоспарлы тексеру жүргізілетінін атап өтті.
Экологтар пікірі
Жамбыл облысының Экология департаменті тілшілердің сауалына берген жауабында "Қазфосфат Минералды тыңайтқыштар" ЖШС санитарлық-қорғау аймағының шекарасында атмосфералық ауаның өлшемдері соңғы рет. 6 сәуірде жүргізілгенін хабарлады.
"Зертханалық зерттеулердің нәтижелері бойынша атмосфералық ауадағы зиян заттардың шекті рұқсат етілген концентрациясынан асу деректері анықталған жоқ", - деп мәлімдеді ведомство.
Ведомство мәліметінше, бұған дейін де зауыт қызметіне қатысты шағымдар түскен. Мәселен, 2025 жылғы 17 қарашада әлеуметтік желілерде Төле би және Ниетқалиев көшелерінің маңында қара түтін мен қою тұман басып тұрғаны туралы ақпарат тараған. Сол кезде де қала тұрғындары департаментке жүгінген болатын. Осыдан кейін мамандар кәсіпорында қарашаның аяғына дейін созылған жоспардан тыс тексеру жүргізді.
"Тексеру кезінде қалдықтар шығатын көздерде өлшемдер жүргізілді. Олар азот оксиді, азот диоксиді және көміртегі оксиді бойынша рұқсат етілген нормалардан асып кеткенін көрсетті", - деп хабарлады департамент өкілдері.
Кәсіпорынға мұндай шығарындылардың қайталанбауы және ластаушы заттардың жер бетінде жиналмауы үшін нақты шаралар әзірлеу туралы нұсқама берілген.
Заңбұзушылықтар үшін компанияға 9,5 миллион теңгеге жуық айыппұл салынып, ол төленген.
Кейінірек, 2026 жылғы 13 қаңтарда әлеуметтік желілерде ауаның ластануы мүмкін екендігі туралы тағы да ақпарат пайда болды - бұл жолы 15-ші ықшамаудан мен Ниетқалиев көшесінің маңында. Департамент мамандары оқиға орнына барып, ауаны тексерген. Ол кезде нормадан асу жағдайлары тіркелген жоқ.
Мамандардың айтуынша, "Қазгидромет" мәліметтері мұны растады: сол күні негізгі ластаушы заттар бойынша көрсеткіштер норма шегінде болған. Бұл ретте синоптиктер қолайсыз ауа райы жағдайларын - қою тұманды атап өтті, соның салдарынан иістер жер бетінде жиналуы мүмкін еді.
Қазіргі уақытта департамент өкілдері "Қазфосфатпен" бірлесіп қосымша шаралар әзірленгенін айтты. Атап айтқанда, желсіз күндері және жел қалаға қарай соққанда кәсіпорын өндіріс жүктемесін 40–50 пайызға төмендетуге тиіс. Сондай-ақ зауыт аумағында ауа райын тұрақты бақылау және жұмыс барысын нақты уақыт режимінде түзету үшін метеостанция орнату жоспарланған.

Фото: видеодан кадр