Президент: Еліміздің Егемендігі, Тәуелсіздігі – ең маңызды, ең қастерлі құндылық

Президент: Еліміздің Егемендігі, Тәуелсіздігі – ең маңызды, ең қастерлі құндылық
Халқымыздың ауызбіршілігін нығайту басты мақсатымыз болып қала береді. Бұл – елдің табысты дамуының бірден-бір шарты, тиімді әрі ұзақмерзімді факторы. Бұл пікірді Мемлекет басшысы Қасым-Жомарт Тоқаев Астанада Мемлекеттік Ту көтеру рәсімінде айтты.

– Реформалардың бастапқы кезеңінде еліміздегі көзі ашық және прогрессивті қоғамдық-саяси күштер жалпыұлттық құндылықтар мен мақсаттар аясында бірігуі қажет деп санаймын. Сонда ғана Әділетті Қазақстанды құру, мемлекеттілігімізді нығайту ісінде табысқа жете аламыз, – деді Президент.

Мемлекет басшысы еліміздің Егемендігі, Тәуелсіздігі – ең маңызды, ең қастерлі құндылық екенін атап өтті.

– Біз өркениетті әрі озық ойлы ұлт ретінде өзімізге сенімді болуымыз керек. Ешкімге жалтақтамай батыл әрекет етуіміз қажет. Бұдан басқа жол жоқ. Мақсаты айқын, көзі ашық, көкірегі ояу азаматтарымыз мемлекет тағдырына жауапты екенін терең түсінеді. Олар еріктілер қатарына қосылып, қайырымдылық жасап, маңызды бастамаларды табысты іске асырып жүр. Нағыз отаншыл адам көзбояушылыққа бармайды, шын патриот ел мүддесі үшін табанды еңбек етеді. Жасампаз отаншылдық дегеніміз де – осы, – деді Қасым-Жомарт Тоқаев.





Фото: Ақорда