Астанадағы LRT станцияларында ұландықтар қызмет атқара бастады: олардың міндеті не?
Астанадағы LRT станцияларында ұландықтар қызмет атқара бастады: олардың міндеті не?
ҚР ІІМ Ұлттық ұланының Telegram-дағы арнасында жарияланған мәліметке сүйенсек, елорда тұрғындарының жеңіл рельсті көлікке деген қызығушылығының және жолаушылар ағынының артуына байланысты ұландықтар LRТ станцияларында қызмет атқара бастаған.
Олар қоғамдық тәртіпті қадағалауға, қауіпсіздік ережелерінің сақталуына, жолаушылар қозғалысын реттеуге көмектеседі.
"Сарбаздар станциялардың ішінде ғана емес, оған іргелес аумақтарда да қызмет атқарады. Дәлірек айтсақ, азаматтарға көмек көрсетеді және жолаушылардың қауіпсіз қозғалысын қамтамасыз етеді.
Негізгі міндет – елорда тұрғындары мен қонақтары үшін қолайлы жағдай жасау, сондай-ақ қоғамдық құқық бұзушылықтардың алдын алу. Азаматтардың қауіпсіздігіне және төтенше жағдайларға жол бермеуге ерекше назар аударылады", - делінген хабарламада.
Ұлттық ұланның баспасөз қызметінің мәліметінше, қазіргі таңда қызмет 17 станцияда екі ауысымдық режиммен жүргізіліп жатыр. Бұл шаралар полиция қызметкерлерімен, көлік қызметтерінің өкілдерімен және LRT әкімшілігімен бірлесіп ұйымдастырылған.
Фото: ҚР ІІМ Ұлттық гвардиясы