Роналду бастаған Португалия Өзбекстан қақпасына бес гол соғып, жеңіске жетті

Роналду бастаған Португалия Өзбекстан қақпасына бес гол соғып, жеңіске жетті  

Футболдан әлем чемпионатының K тобындағы екінші тур аясында Португалия мен Өзбекстан құрамалары кездесті. АҚШ-тың Хьюстон қаласындағы NRG Stadium аренасында өткен матчта португалиялықтар 5:0 есебімен ірі жеңіске жетті, деп хабарлайды "Бірінші бол".

Кездесудің 6-минутында Криштиану Роналду есеп ашып, Португалияны алға шығарды. 17-минутта Нуну Мендеш есеп айырмасын екі голға жеткізді. Ал 39-минутта Роналду тағы бір мәрте мергендік танытып, дубль авторы атанды.
Матчтың 29-минутында Өзбекстан қорғаушысы Азизжон Ғаниевтің голы VAR тексерісінен кейін есепке алынбады. Төрешілер Аббосбек Файзуллаевтың Жоау Канселуға қарсы ереже бұзғанын анықтады.
Екінші таймда өзбекстандық қақпашы Абдувохид Нематов автогол авторы атанса, ойынның соңғы нүктесін 87-минутта Рафаэл Леау қойды.
Осы жеңістен кейін Португалия құрамасы 4 ұпай жинап, K тобында көш бастады. Ал екі матчта да жеңілген Өзбекстан құрамасы топтың соңғы сатысында қалып отыр.
Үшінші турда Португалия Колумбиямен кездессе, Өзбекстан ДР Конго құрамасына қарсы алаңға шығады.

Фото: Paul ELLIS / AFP via Getty Images