Елімізде кәсіптік бағдар берудің жаңа тұжырымдамасы іске қосылады
Бұл туралы Оқу-ағарту министрі Ғани Бейсембаев Үкімет отырысында мәлімдеді.
Министрдің айтуынша Үкімет жанынан комиссия құрылып, техникалық және кәсіптік білім беруді трансформациялаудың жол картасы қабылданған. Сонымен қатар осы жұмыс аясында кәсіби бағдар берудің жаңа тұжырымдамасы іске қосылады. Осы бағыттағы жұмысты жүйелі дамыту үшін «Жаңа мамандықтар атласы» әзірленеді.
«Кәсіптік бағдар берудің жаңа тәсілдері оқушыларға еңбек нарығындағы жаңа талаптар туралы білуге, экономиканың нақты секторларындағы мансап перспективаларын бағалауға және мамандықтарды дұрыс таңдауға мүмкіндік береді. Бұл үшін мектептердегі кәсіби бағдарлау қызметі күшейтіледі, осы арқылы оқушылар толығымен кәсіби диагностикамен қамтылады», — деп атап өтті Ғани Бейсембаев.
Кәсіпорындар мен колледждердің ынтымақтастығы арқылы 1 мың мектепте бейіндік сыныптар ашылатыны атап өтілді. Жоғары сынып оқушыларын практикалық дағдыларға және колледждер базасында алғашқы жұмыс кәсібіне оқыту тәжірибесі енгізіледі.
Фото: mycollege.kz