Астана көшелеріне София және Марко Поло атауын беру ұсынылды

Елордада қалалық мәслихаттың кезектен тыс сессиясында Астана қаласының Тілдерді дамыту және мұрағат ісі басқармасы ММ басшысының міндетін атқарушы Досжан Исабек Астанада көше атауларын беру бойынша бірқатар жаңа ұсыныс қаралып жатқаны жөнінде айтты. 

Оның сөзінше, бүгін қолданыстағы заңнамалық талаптарға сәйкес, бұл ұсыныстар қайтадан тиісті комиссияның қарауына енгізілген.

– Ұсыныстарға сәйкес, Нұра ауданында орналасқан жобалық атауы Е-754 көшесіне «София» атауын беру ұсынылып отыр. Бұған дейін Болгария астанасы София қаласында орталық көшелердің біріне «Астана» атауы берілген болатын. Сол көшенің ұзындығы шамамен бір шақырымнан асса, Астанада ұсынылып отырған көше ұзындығы 535 метрді құрайды. Бұл аумақта «Хилтон» қонақүйі, «Жер және адам» ұлттық музейі сияқты маңызды нысандар орналасқан, - деді ол.

Бұдан бөлек Досжан Исабек екінші ұсыныстың Италиямен байланысты екенін атап өтті. 

– Тұран даңғылынан басталып Қабанбай батыр даңғылына дейін созылатын, «Астана Арена» спорт кешені мен «Алау» мұз айдынының сарайы арасындағы атаусыз көшеге Марко Поло атауын беру қарастырылып отыр. Бәріміз білетіндей, Марко Поло – XIII-XIV ғасырларда өмір сүрген венециялық көпес әрі саяхатшы, Азия туралы құнды географиялық және тарихи деректер қалдырған тұлға, - деді мекеме басшысының міндетін атқарушы.

Ұсынысты қолдаушылар мұндай шешім халықаралық мәдени байланыстарды нығайтуға және өзара құрмет принциптерін ілгерілетуге ықпал ететінін атап өтеді.

Фото: Мұхтар Холдорбеков / Кazinform